Alla Itolae Nusa 41
Kena musuna lua u bei Pirone isirie elake maka raka tamata maka aknekae yelu rebe Pirone kinue bei buije, Pirone ikmani be ikele me kwele Nile esi leine.
Eleki iselu sape inai itu usiri bei kwele Nile, esi nanakwalaiju nkopa kai mise usa kane tapuane me kwele leine.
Eleki sape inai itu maketa usiri suike bei kwele mere esi nanakwalaiju tiae kai nkukuta usa kele tehaike sape inai itu nkopanaru.
Eleki sape inai itu nkukutaru ukane sape inai itu nkopanaru. Eleki Pirone khutukeni eleki ibetu.
Eleki Pirone intulu hoko ikmani suike be iselu gandume unui itu tinata kai miseta ukusu bei aini esa.
Eleki iselu gandume unui itu maketa ukusu po nkuku kai koseta le kena balate bei otoi nsekile.
Eleki gandume unui itu nkukuta kai koseta meru ulelu gandume unui itu miseta kai tinataru. Eleki hkutuke Pirone eleki ibetu, irekwa be mere ikmani.
Eleki kena beletire Pirone iroweni hoko iulake koti pusue tamata rebe rekwa kai tamata maka leru me Mesire. Eleki Pirone ilulu eni kmaniru etesi po sae irekwa esi natire mo.
Eleki elake maka raka tamata maka aknekae yelu rebe Pirone kinue ibeteke loko Pirone be,
“Petu meije au nete suike loko auku sala akmenare.
Kena mere Pirone lalemue tiake au kai elake maka raka tamata maka moa ete ale, eleki akusue ami lua kena bui.
Kena petu sae me ami luama kmani, kmani meru esi natire tetebike.
Kena mere sakesa kai ami me bui laleije tamata beluke esa bei Ibrani, elake maka raka ale eni maka ulake. Eleki ami lulu amiki kmaniru etei eleki ibeteke esi natire ete ami lua lulu sae erini kmanire.
Hoko ibeteke ami luama kmanire esi natire be au leu suike lokoku makerike yo elake maka raka tamata maka moa ete ale kweline, eono lulu ibeteke kmanire esi natire, tinai.”
Pirone iulake koti Yusupe bei buije. Hoko esi sirieni sosoli bei buije eleki ikoki eni biru buluru kai isuli lapu misete eleki ikeu loko Pirone.
Yusupe iluake loko Pirone eleki Pirone ibeteke lokoi be,
“Auku kmani po sae irekwa esi natire mo. Po au lene be batuke alene tamata ilulu kmanire asupu beteke esi natire.”
Yusupe ibeteke loko Pirone be,
“Mere au mo po mere Alla pine Ibeteke Iriluke misete ete ale.”
Eleki Pirone ibeteke loko Yusupe be,
“Auku kmani be au kele me kwele Nile esi leini;
eleki au selu sape inai itu usiri bei kwelere esi nanakwalaiju nkopa kai umise, usa ukane tapuane me kwele leine mere.
Po takwali mo au selu sape inai itu maketa usiri bei kwele leneke. Esi nanakwalaiju tiae kai nkuku, au selu sape ete mei Mesire lupe sapea meru sae mosa.
Sape inai itu tiae kai nkukuta meru ukane sape inai itu miseta kai nkopana rebe usiri akmenare.
Po masike sape inai nkukuta itu meru ukane sape inai itu nkopana meru pusulu po esi nanakwalaije uru nkuku lupe akmenare neka. Eleki hkutukeku.
Eleki au ntulu suike hoko au kmani suike be au selu gandume unui itu ktinata kai miseta ukusu bei aini esa.
Eleki au selu gandume unui itu maketa ukusu po koseta kai nkukuta le balate bei otoi nsekile ekeule.
Eleki gandume unui itu nkukuta meru ulelu gandume unui itu miseta akmenare. Kmani meije au aleneke ete tamata maka leru mei Mesire meije po sae ibeteke esi natire ete au mo.”
Eleki Yusupe ibeteke loko Pirone be,
“Amu kmani lua meru esi natire nesa. Saisa rebe Alla Ionore, Ibeteke ete ntuane ale.
Sape inai itu miseta kai nkopanaru meru esi natire musuna itu kai gandume unui itu miseta meru esi natire musuna iture neka hoko esi natire nesa.
Sape inai itu nkukuta rebe usiri pamulire meru esi natire musuna itu kai gandume unui itu nkukuta kai koseta kena balate bei otoi nsekile mere esi natire musuna iture neka. Hoko tatike pine susa manane musuna itu.
Hoko saisa rebe au betekele ete ntuane ele meije, Alla Iaseluke saisa rebe Ionore etemu kena kmani.
Ntuane Pirone anete mimise be musuna iture mei pusue Mesire, manane boka.
Po tatike pine musuna itu suike susae manane hoko sae inete loko akmena manane bokala rebe me Mesire moneka le susae manane kai tapele unseki pusulu.
Hoko sae inete loko akmena manane bokala rebe me Mesire moneka le susae manane mere ektili kuate.
Eti kmani mere ntuane Pirone aselu rebai lua le mere Alla Ionoe titinai kai takwali moneka.
Hoko ele mere ntuane anikwa tamata rebe irekwa mise titinai leke bitikeni kena ikbasa pusue tape Mesire.
Hoko ntuane Pirone aono elere: abitike tamata maketa lekwe kena esi raka tape Mesire leke esi rana hasile rebe lara lima beie pusue hasile rebe esi supu kena musuna itu supu manane bokare leke esi hnoukelu.
Eleki esi lupuke pusue manane kena musuna itu meiju lulu amu kbasa kena esi lupukelu me kota kena kanele kai hnoukelu.
Hoko manane rebe hnoukelu mere aknekaelu kena musuna itu rebe susae manane leke tamata Mesira meiju esi mata manane yake.”
Yusupe eni lepate mere ntuane Pirone kai eni tamata makerikaru esi sukae.
Eleki ntuane Pirone ibeteke loko eni makerikaru be,
“Tamata rebe Alla Eni Rore Ikbasaeni ele meije, susa kena ite supui.”
Eleki Pirone ibeteke loko Yusupe be,
“Alla Ibeteke pusue meije etemu le tamata maketa esi rekwa lesi bei ale moneka.
Hoko akbasa pusue auku luma lalei meije kai pusue tamata mei Mesire esi lene lokomu. Batuke auku maka rue meije pine arue kena mo.”
Eleki ntuane Pirone ibeteke suike loko Yusupe be,
“Au bitike ale kena akbasa pusue tamata Mesire meije.”
Eleki ntuane Pirone ilesu eni sapukure bei balaubuije eleki ikusuele kena Yusupe eni balaubuije kai iono Yusupe ialike lapu misete kai ienuke rante misete bei mase kena Yusupe eni mokane.
Ntuane Pirone iulake buake Yusupe kena eni kereta kuda nomore luare kai pusue tamataru esi kloloe me Yusupe oaije be,
“Tatu loko Yusupe!”
Bitike Yusupe kena kbasae pusue Mesire ele mere.
Eleki Pirone ibeteke loko Yusupe be,
“Masike aure Pirone po ono saisa mei Mesire suke lene loko ale sa po mo hoko sae ono mo.”
Eleki ntuane Pirone ikoti Yusupe Sapnate Paanea, kai iriluke Asnate, Potipera imame me One eni nanare ete Yusupe kena eni bina.
Kena Yusupe ikeu loko ntuane Pirone, Yusupe eni musuna butu telu. Eleki Yusupe ikeu bei ntuane Pirone kena ikeu keholi kota Mesiraru.
Eleki Yusupe ilupuke manane kena musuna itu mere eleki ihnoukelu me kotaru. Elemere hoko Yusupe ilupuke manana boka titinai lupe ume ndau meite leini eti sae ineheke tekwa moneka. Hoko tape Mesire esirie manana boka titinai kena musuna itu meru.
[tolong lihat ayat sebelumnya]
[tolong lihat ayat sebelumnya]
Eleki kena susata musuna itu meru ebusa mosare Yusupe eni bina Asnate imame me kota One eni nanare irue le kwete mokwai lua ete Yusupe peneka.
Yusupe iono kwete menare eni nane Manase le ibeteke be,
“Alla Iono au nete loko auku susate moneka kai amaku eni lumatoine.”
Kai eni nanae nomore luare iono eni nane Epraime le ibeteke be,
“Alla iono au supu kwetela kena tape susate.”
Musuna itu rebe manana boka me Mesire elia peneka,
hoko musuna itu susate luake lulu Yusupe eni lepate. Hoko pusue nusa maketaru susa manane po me Mesire manene bokala.
Kena me tape Mesire susa manane hoko esi koti manane bei ntuane Pirone. Eleki ntuane Pirone ibeteke loko pusue tamata me Mesire be,
“Keu loko Yusupe kai ono lulu eni lepate.”
Susate manane mere pusue nusa. Susate manane mere etapa rame hoko Yusupe ibaeke pusue otoi maka lupuke manane kena iabelie ete tamata me Mesire.
Kai pusue tamata bei nusa makete esi luake me Mesire kena sabe manane bei Yusupe le susate manane mere pusue nusa.